ஸ்பெயின் பயன்படுத்தும் 'டிகி

ஸ்பெயின் பயன்படுத்தும் 'டிகி-டாகா' வியூகம் என்றால் என்ன? அரையிறுதியில் பிரான்ஸ் உடன் மெகா மோதல்

ஆர்லிங்டன்: உலகக் கோப்பை கால்பந்து தொடரின் முதல் அரை இறுதிப் போட்டியில், முன்னாள் சாம்பியன்களான ஸ்பெயின் மற்றும் பிரான்ஸ் அணிகள் பலப்பரீட்சை நடத்த உள்ளன. இதில் ஸ்பெயினின் 'டிகி-டாகா' ஆட்டமுறைக்கும், பிரான்ஸின் மின்னல் வேக எதிர்-தாக்குதல் ஆட்டமுறைக்கும் இடையே பலத்த போட்டி நிலவ உள்ளது.

ஸ்பெயின் அணியின் அடையாளமாக விளங்கும் 'டிகி-டாகா' என்பது விரைவாக பந்தை வீரர்களிடையே மாற்றுவது, வீரர்களின் இடைவிடாத இயக்கம் மற்றும் பந்தை அதிக நேரம் தங்களின் கட்டுப்பாட்டில் வைத்திருப்பது போன்றவற்றை அடிப்படையாகக் கொண்ட ஒரு தனித்துவமான ஆட்டமுறையாகும்.

இதன் முக்கியத்துவம் ஒன்று அல்லது இரண்டு தொடுதல்களில் பந்தை விரைவாக சக வீரர்களுக்கு மாற்றுவது, மைதானத்தில் இடைவெளிகளை உருவாக்கி பந்தை எளிதாகப் பெற வீரர்கள் தொடர்ந்து நகர்ந்து கொண்டே இருப்பது, 60 முதல் 70 சதவீதத்திற்கும் அதிகமான நேரம் பந்தைத் தங்கள் வசம் வைத்திருப்பது, பந்தை எதிரணியிடம் பறிகொடுத்த உடனேயே அதை மீண்டும் பெற தீவிரமாக அழுத்தம் கொடுப்பது என்பது தான்.

பார்சிலோனா அணியின் பயிற்சியாளராக பெப் கார்டியோலா இருந்த காலத்தில் (2008-2012) இந்த ஆட்டமுறை உலகப் புகழ்பெற்றது. 2008 யூரோ கோப்பை, 2010 உலகக் கோப்பை மற்றும் 2012 யூரோ கோப்பை ஆகியவற்றை ஸ்பெயின் வெல்வதற்கும் இந்த 'டிகி-டாகா' தத்துவமே அடித்தளமாக அமைந்தது.

இதற்கு நேர்மாறாக, பிரான்ஸ் அணி அசாத்திய வேகம் மற்றும் உடல் வலிமையைப் பயன்படுத்தி மின்னல் வேகத்தில் எதிரணியை தாக்கும் கவுண்டர்-அட்டாக் ஆட்டமுறையைக் கொண்டுள்ளது. பந்தை எதிரணி வசம் இருக்க அனுமதித்துவிட்டு, சரியான நேரத்தில் பந்தைப் பறித்து மின்னல் வேகத்தில் கோல் அடிப்பதே அவர்களின் பாணியாகும். 1998 மற்றும் 2018ஆம் ஆண்டுகளில் பிரான்ஸ் உலகக் கோப்பையை வெல்ல இந்த வியூகமே முக்கிய காரணமாக இருந்தது.

இந்த உலகக்கோப்பையில் ஸ்பெயின் அணி ஆஸ்திரியா (3-0), போர்ச்சுகல் (1-0), மற்றும் பெல்ஜியம் (2-1) அணிகளை வீழ்த்தி அரை இறுதிக்கு வந்துள்ளது. பிரான்ஸ் அணி ஸ்வீடன் (3-0), பராகுவே (1-0), மற்றும் மொராக்கோ (2-0) அணிகளை வீழ்த்தி முன்னேறியுள்ளது.

அமெரிக்காவின் டெக்சாஸ் மாகாணத்தில் உள்ள ஏடி&டி மைதானத்தில் ஜூலை 14 அன்று இப்போட்டி நடைபெற உள்ளது. இந்திய நேரப்படி ஜூலை 15ஆம் தேதி (புதன்கிழமை) அதிகாலை 12:30 மணிக்கு இந்த மெகா அரை இறுதிப் போட்டி தொடங்குகிறது.