இந்தியா

இந்தியா - வெஸ்ட் இண்டீஸ் டி20 தொடர் நாளை தொடக்கம்

லக்னோ: இந்தியா - வெஸ்ட் இண்டீஸ் அணிகள் மோதும் டி20 தொடர், லக்னோவில் நாளை தொடங்குகிறது. இந்தியாவில் சுற்றுப்பயணம் மேற்கொண்டுள்ள வெஸ்ட் இண்டீஸ் அணி முதலில் 3 போட்டிகள் கொண்ட ஒருநாள் தொடரில் மோதியது. முதல் 2 போட்டிகளில் அபாரமாக வென்ற இந்தியா 2-0 என முன்னிலை பெற்றதுடன் தொடரையும் கைப்பற்றிய நிலையில், நியூ சண்டிகரில் நேற்று முன்தினம் நடந்த 3வது ஒருநாள் போட்டியில் வெஸ்ட் இண்டீஸ் 5 விக்கெட் வித்தியாசத்தில் ஆறுதல் வெற்றியை வசப்படுத்தியது.

இந்தியா 50 ஓவரில் 7 விக்கெட் இழப்புக்கு 351 ரன் குவித்த நிலையில் (ரோகித் 92, ருதுராஜ் 57, கே.எல்.ராகுல் 129*, நமன் 30, காம்போஜ் 17), கடினமான இலக்கை துரத்திய வெஸ்ட் இண்டீஸ் 48.2 ஓவரில் 5 விக்கெட் இழப்புக்கு 352 ரன் எடுத்து அசத்தியது. கேப்டன் ஷாய் ஹோப் ஆட்டமிழக்காமல் 162 ரன் (143 பந்து, 17 பவுண்டரி, 3 சிக்சர்) விளாசி வெற்றிக்கு உதவினார். ஜாங்கூ 67, ரூதர்போர்டு 24, கீமோ பால் 44, குடகேஷ் 19* ரன் எடுத்தனர்.

இந்தியா 2-1 என்ற கணக்கில் ஒருநாள் தொடரை கைப்பற்றியது. வெஸ்ட் இண்டீஸ் அணி கேப்டன் ஷாய் ஹோப் ஆட்ட நாயகன் விருதும், இந்திய அணி கேப்டன் கில் தொடர் நாயகன் விருதும் பெற்றனர். அடுத்து இரு அணிகளும் 5 போட்டிகள் கொண்ட டி20 தொடரில் மோதுகின்றன. முதல் போட்டி லக்னோவில் நாளை இரவு 7.00 மணிக்கு தொடங்குகிறது. அதைத் தொடர்ந்து ராஞ்சி (அக்.9), இந்தூர் (அக்.11), ஐதராபாத் (அக்.14) மற்றும் பெங்களூருவில் (அக்.17) டி20 போட்டிகள் நடைபெற உள்ளன. இந்த தொடருக்கான இந்திய அணி ஷ்ரேயாஸ் அய்யர் தலைமையில் களமிறங்குகிறது.