ராக்கெட்டை உடைத்து கேமராமேனை விரட்டிய சபலென்கா.. அமெரிக்க ஓபன் பைனல் தோல்வியால் ஆவேசம்

ராக்கெட்டை உடைத்து கேமராமேனை விரட்டிய சபலென்கா.. அமெரிக்க ஓபன் பைனல் தோல்வியால் ஆவேசம்

நியூயார்க்: 2026 அமெரிக்க ஓபன் டென்னிஸ் மகளிர் ஒற்றையர் இறுதிப் போட்டியில் எலினா ரைபாகினாவிடம் தோல்வியடைந்த பிறகு, நடப்பு சாம்பியன் அரினா சபலென்கா மைதானத்தில் தனது ராக்கெட்டை அடித்து உடைத்தும், கேமராமேனை விரட்டியடித்தும் தனது ஆத்திரத்தை வெளிப்படுத்திய சம்பவம் பெரும் பரபரப்பை ஏற்படுத்தியுள்ளது.

இந்த இறுதி ஆட்டத்தில், பெலாரஸ் நாட்டின் அரினா சபலென்கா 6-4, 5-7, 6-2 என்ற செட் கணக்கில் கஜகஸ்தானின் எலினா ரைபாகினாவிடம் வீழ்ந்தார். கடந்த 2024 மற்றும் 2025 ஆண்டுகளில் சாம்பியன் பட்டம் வென்ற சபலென்கா, இம்முறை தொடர்ந்து 3-வது முறையாக பட்டம் வென்று ஹாட்ரிக் சாதனை படைக்கும் வரலாற்று வாய்ப்பை நழுவவிட்டார்.

போட்டி முடிந்த அடுத்த நொடியே, ஏமாற்றத்தைத் தாங்க முடியாத சபலென்கா தனது கையில் இருந்த டென்னிஸ் ராக்கெட்டை தரையில் ஓங்கி அடித்து உடைத்தார். அதுமட்டுமின்றி, பரிசளிப்பு விழா முடிந்த பின்னர் தனது பயிற்சியாளர் குழுவுடன் அவர் அமர்ந்திருந்த போது, வீடியோ எடுக்க வந்த நபரை நோக்கி ஆக்ரோஷமாக கையை அசைத்து, உடனே அங்கிருந்து வெளியேறுமாறு சைகை காட்டி விரட்டினார்.

இது குறித்து போட்டிக்குப் பிந்தைய செய்தியாளர் சந்திப்பில் பேசிய சபலென்கா, "தொடர்ச்சியாக 3-வது முறையாக பட்டம் வெல்லும் வாய்ப்பை கிராண்ட்ஸ்லாம் இறுதிப்போட்டியில் இழக்கும் போது, நமது உணர்ச்சிகளைக் கட்டுப்படுத்துவது மிகவும் கடினம். அந்த ஏமாற்றத்தையும் கோபத்தையும் நான் உள்ளேயே அடக்கி வைத்திருந்தால் என்னால் பேசக் கூட முடியாது. அதனால்தான் என் கோபத்தை வெளியில் கொட்டினேன்" என்று வெளிப்படையாகக் கூறினார்.

2026 சீசனில் ஆஸ்திரேலிய ஓபன் மற்றும் அமெரிக்க ஓபன் இரண்டின் இறுதிப்போட்டியிலும் ரைபாகினாவிடம் தோற்ற சபலென்கா, இந்த ஆண்டு ஒரு கிராண்ட்ஸ்லாம் பட்டம் கூட வெல்ல முடியாமல் ஏமாற்றத்துடன் முடித்துள்ளார். உலகின் நம்பர் 1 தரவரிசையையும் அவர் ரைபாகினாவிடம் இழந்திருப்பது குறிப்பிடத்தக்கது. மறுபுறம் ரைபகினா தனது முதல் அமெரிக்க ஓபன் கிராண்ட்ஸ்லாம் பட்டத்தை வென்று சாதனை படைத்தார்.