தங்கத்தை நூலிழையில் தவறவிட்ட இஷா சிங்.. ஆசிய விளையாட்டு துப்பாக்கி சுடுதலில் இந்தியாவுக்கு வெள்ளி

தங்கத்தை நூலிழையில் தவறவிட்ட இஷா சிங்.. ஆசிய விளையாட்டு துப்பாக்கி சுடுதலில் இந்தியாவுக்கு வெள்ளி

ஐச்சி: 2026 ஆசிய விளையாட்டுப் போட்டி துப்பாக்கி சுடுதலில் மகளிர் 25 மீட்டர் பிஸ்டல் தனிநபர் பிரிவில் இந்திய இளம் வீராங்கனை இஷா சிங் அசாத்திய திறமையை வெளிப்படுத்தி வெள்ளிப் பதக்கம் வென்று சாதனை படைத்துள்ளார். கடைசி வினாடி வரை உச்சக்கட்ட பரபரப்புடன் நீடித்த இறுதி சுற்றில், சீன வீராங்கனைக்கு எதிராக போராடி நூலிழையில் தங்கப் பதக்க வாய்ப்பை தவறவிட்டார்.

மகளிர் 25 மீட்டர் பிஸ்டல் இறுதிப்போட்டிக்கு தகுதி பெற்ற ஒரே இந்திய வீராங்கனையான இஷா சிங், தொடக்கம் முதலே துல்லியமாக இலக்குகளை தாக்கி ஆதிக்கம் செலுத்தினார். முதல் சுற்றில் 5-க்கு 5 புள்ளிகளையும் துல்லியமாக சுட்டு அசத்தினார்.

போட்டியின் நடுப்பகுதியில் 4வது இடத்திற்கு தள்ளப்பட்டாலும், எலிமினேஷன் சுற்றில் 5-க்கு 5 இலக்குகளை மிகச் சரியாக தாக்கி பதக்க வாய்ப்பை உறுதி செய்தார். வெள்ளி மற்றும் தங்கப் பதக்கத்திற்கான ஷூட்-ஆஃப் போட்டியில் வடகொரிய வீராங்கனை கிம்மை எதிர்கொண்ட இஷா சிங், 3-2 என்ற புள்ளிக் கணக்கில் வீழ்த்தி வெள்ளிப் பதக்கத்தை உறுதி செய்தார். அடுத்து தங்கப் பதக்கத்திற்கான நேரடி போட்டிக்கு முன்னேறினார்.

தங்கப் பதக்கத்திற்கான இறுதிச் சுற்றில் உலக அளவில் முன்னணி வீராங்கனையான சீனாவின் சியாவோவை எதிர்த்து இஷா சிங் களமிறங்கினார். இந்த சுற்றில் இருவரும் சம பலத்துடன் மோதினர். வழக்கமான சுற்று முடிவில் இருவரும் சமநிலையில் இருந்ததால் வெற்றியாளரை தீர்மானிக்க அடுத்தடுத்து கூடுதல் ஷூட்-ஆஃப் சுற்றுகள் நடத்தப்பட்டன. முதல் ஷூட்-ஆஃப் சுற்றில் இருவரும் 4-4 என மீண்டும் சமநிலை அடைந்து ஆட்டத்தில் உச்சக்கட்ட பரபரப்பை ஏற்படுத்தினர்.

இறுதியாக நடத்தப்பட்ட கடுமையான ஷூட்-ஆஃப் சுற்றில், சீன வீராங்கனை சியாவோ 3-2 என்ற கணக்கில் முன்னிலை பெற்று தங்கப் பதக்கத்தை தட்டிச் சென்றார். கடைசி வரை களத்தில் நின்று போராடிய இந்திய வீராங்கனை இஷா சிங், வெள்ளிப் பதக்கத்தை வென்றார். இறுதி வினாடி வரை உலக சாம்பியன் வீராங்கனைக்கு ஈடுகொடுத்து விளையாடிய இஷா சிங்கின் இந்த அசாத்திய ஆட்டம் இந்திய ரசிகர்களின் பாராட்டுகளை குவித்து வருகிறது.