ஆசிய கோப்பையை 8வது முறையாக வென்று இந்திய மகளிர் அணி சாதனை.. பைனலில் இலங்கைக்கு பதிலடி

ஆசிய கோப்பையை 8வது முறையாக வென்று இந்திய மகளிர் அணி சாதனை.. பைனலில் இலங்கைக்கு பதிலடி

துபாய்: மகளிர் ஆசிய கோப்பை 2026 இறுதிப் போட்டியில் இலங்கை அணியை 72 ரன்கள் வித்தியாசத்தில் வீழ்த்தி, இந்திய மகளிர் கிரிக்கெட் அணி 8-வது முறையாக சாம்பியன் பட்டத்தைக் கைப்பற்றி வரலாற்று சாதனை படைத்துள்ளது. இதன் மூலம் கடந்த 2024 இறுதிப் போட்டியில் இலங்கையிடம் அடைந்த தோல்விக்கு இந்திய அணி பழிதீர்த்துக் கொண்டதுடன், ஆசிய கிரிக்கெட்டில் தங்களின் ஆதிக்கத்தை மீண்டும் நிலைநிறுத்தியுள்ளது.

துபாயில் நடைபெற்ற இப்போட்டியில் முதலில் பேட்டிங் செய்த இந்திய மகளிர் அணி, தொடக்க வீராங்கனைகளின் சிறப்பான ஆட்டத்தால் வலுவான ஸ்கோரை எட்டியது. இந்திய அணியின் தொடக்க ஜோடி முதல் விக்கெட்டுக்கு 129 ரன்கள் குவித்து அசத்தியதுடன், இருவருமே அரைசதம் கடந்து அசத்தினர்.

எனினும், மிடில் ஆர்டர் பேட்டர்களால் இந்த வேகத்தைத் தொடர முடியவில்லை. இறுதி ஓவர்களில் ஜி. கமலினியின் அதிரடி ஆட்டம் 5 பந்துகளில் 15 ரன்கள் எடுக்க இந்திய அணி 180 ரன்களைக் கடந்தது. இலங்கை தரப்பில் மிதாலி அயோத்யா, சமாரி அதபத்து மற்றும் சாமுடி பிரபோதா ஆகியோர் தலா ஒரு விக்கெட்டை வீழ்த்தினர்.

கடினமான இலக்கை நோக்கிப் பயணித்த இலங்கை அணிக்கு ஆரம்பத்திலேயே விக்கெட் சரிந்தது. எனினும், சமாரி அதபத்து 36 ரன்கள் மற்றும் விஷ்மி குணரத்னே 20 ரன்கள் எடுக்க, இந்த ஜோடி 58 ரன்கள் சேர்த்து அணியை மீட்டெடுக்க முயன்றது. ஆனால், ரன் ரேட் அழுத்தம் காரணமாக ஒரே ஓவரில் இந்த இரு முக்கிய விக்கெட்டுகளும் வீழ்ந்தன. இதுவே ஆட்டத்தின் திருப்புமுனையாக அமைந்தது.

அதன் பிறகு இலங்கை அணியினரால் மீண்டெழ முடியவில்லை. மிடில் ஆர்டர் பேட்டர்கள் இந்திய அணியின் பந்துவீச்சை எதிர்கொள்ள முடியாமல் அடுத்தடுத்து ஆட்டமிழந்தனர். 63/3 என்ற நிலையில் இருந்து 104/8 என சரிந்த இலங்கை அணி, இறுதியில் 20 ஓவர்களில் 111 ரன்களுக்கு அனைத்து விக்கெட்டுகளையும் இழந்து தோல்வியைத் தழுவியது.

இந்திய அணியின் பந்துவீச்சில் ஸ்ரீ சரணி 20 ரன்களை மட்டுமே வழங்கி 4 விக்கெட்டுகளை வீழ்த்தினார். தீப்தி சர்மா 4 ஓவர்களில் 19 ரன்கள் கொடுத்து 3 விக்கெட்டுகளைக் கைப்பற்றினார். பிரேமா ராவத் மற்றும் ஷஃபாலி வர்மா ஆகியோரும் தலா ஒரு விக்கெட்டை வீழ்த்தி வெற்றிக்குக் கைகொடுத்தனர். இறுதியில் தீப்தி சர்மாவின் பந்துவீச்சில் கௌஷினி நுத்யாங்கனா கிளீன் போல்டானதை அடுத்து, இந்தியா மகளிர் அணி ஆசிய கோப்பையை கைப்பற்றியது.