2026 ஆசிய விளையாட்டுப் போட்டியில் பருல் சவுத்ரிக்கு வெண்கலம்.. தங்கப் பதக்கம் நழுவியது

2026 ஆசிய விளையாட்டுப் போட்டியில் பருல் சவுத்ரிக்கு வெண்கலம்.. தங்கப் பதக்கம் நழுவியது

நகோயா: 2026 ஆசிய விளையாட்டுப் போட்டியில் மகளிர் 5,000 மீட்டர் ஓட்டப்பந்தயத்தில் நடப்பு சாம்பியனான இந்திய வீராங்கனை பருல் சவுத்ரி வெண்கலப் பதக்கம் வென்றார். இதே போட்டியில் பஹ்ரைன் வீராங்கனை வின்ப்ரெட் யாவி தங்கப் பதக்கம் வென்று வரலாற்று சாதனை படைத்துள்ளார்.

மகளிர் 5,000 மீட்டர் இறுதிப்போட்டியில் இந்தியாவின் சார்பில் பருல் சவுத்ரி மற்றும் சீமா ஆகியோர் களமிறங்கினர். பந்தயத்தின் தொடக்கத்தில் இந்திய வீராங்கனை சீமா பின்தங்கினாலும், பருல் சவுத்ரி முன்னிலை குழுவிலேயே தொடர்ந்து நீடித்தார்.

கடைசி கட்டத்தில் கடுமையான போட்டி நிலவிய நிலையில், பருல் சவுத்ரி பந்தய தூரத்தை 15:14.61 நிமிடங்களில் கடந்து 3வது இடத்தை பிடித்து வெண்கலப் பதக்கத்தை வென்றார். கடந்த 2022 ஆசிய விளையாட்டுப் போட்டியில் தங்கப் பதக்கம் வென்ற பருல் சவுத்ரிக்கு, இம்முறை கடுமையான சவால்களுக்கு மத்தியில் வெண்கலப் பதக்கம் மட்டுமே கிடைத்துள்ளது.

இந்த போட்டியில் பஹ்ரைன் நாட்டின் நட்சத்திர வீராங்கனை வின்ப்ரெட் யாவி தங்கப் பதக்கத்தை தட்டிச் சென்றார். இதன் மூலம் ஒரே ஆசிய விளையாட்டுப் போட்டியில் மூன்று தனிநபர் தடகளப் பிரிவுகளில் தங்கம் வென்ற முதல் பெண் வீராங்கனை என்ற உலகளாவிய வரலாற்று சாதனையை அவர் படைத்துள்ளார்.

வின்ப்ரெட் யாவி 2026 ஆசிய விளையாட்டுப் போட்டியில் ஏற்கனவே 1,500 மீட்டர் மற்றும் 3,000 மீட்டர் ஸ்டீபிள்சேஸ் ஆகிய பிரிவுகளில் தங்கம் வென்றிருந்த நிலையில், தற்போது 5,000 மீட்டர் பந்தயத்திலும் தங்கத்தை வென்று ஹாட்ரிக் அடித்து முத்திரை பதித்துள்ளார்.