ஷாய் ஹோப் உலக சாதனை.. கோலி வரிசையில் புதிய வரலாறு.. கெயில் சாதனையையும் சமன் செய்தார்

ஷாய் ஹோப் உலக சாதனை.. கோலி வரிசையில் புதிய வரலாறு.. கெயில் சாதனையையும் சமன் செய்தார்

ஹைதராபாத்: இந்திய அணிக்கு எதிரான 4-வது டி20 போட்டியில் வெறியாட்டம் ஆடிய வெஸ்ட் இண்டீஸ் கேப்டன் ஷாய் ஹோப், கிறிஸ் கெயிலின் வரலாற்று சாதனையை சமன் செய்ததுடன், விராட் கோலி மற்றும் சூர்யகுமார் யாதவ் வரிசையில் இணைந்து புதிய உலக சாதனை படைத்துள்ளார்.

ஹைதராபாத்தில் நடைபெற்ற இப்போட்டியில் 20-வது ஓவரின் கடைசி 2 பந்துகளில் சதத்தை எட்ட அவருக்கு 10 ரன்கள் தேவைப்பட்டது. அப்போது தனது புதிய பேட்டை மாற்றிய ஷாய் ஹோப், நிதீஷ் குமார் ரெட்டி வீசிய கடைசி 2 பந்துகளையும் அடுத்தடுத்து பிரம்மாண்ட சிக்சர்களாகப் பறக்கவிட்டு, 50 பந்துகளில் 102 ரன்கள் குவித்து மலைக்க வைத்தார். நடப்பு டி20 தொடரில் அவர் அடித்த 2-வது சதம் இதுவாகும். அத்துடன் இந்த இந்திய சுற்றுப்பயணத்தில் அவர் அடிக்கும் 4-வது சர்வதேச சதமாகவும் இது பதிவானது.

இந்த இன்னிங்ஸ் மூலம் சர்வதேச டி20 அரங்கில் வெஸ்ட் இண்டீஸ் அணிக்காக அதிகமுறை 50 ரன்களுக்கு மேல் குவித்த ஜாம்பவான் கிறிஸ் கெயிலின் வரலாற்று சாதனையை ஷாய் ஹோப் சமன் செய்தார். இருவரும் தலா 16 முறை 50 ரன்களுக்கு மேல் அடித்து முதலிடத்தைப் பகிர்ந்து கொண்டுள்ளனர். எவின் லூயிஸ் 15 முறையும், நிக்கோலஸ் பூரன் 13 முறையும் இந்த மைல்கல்லை எட்டியுள்ளனர்.

மேலும் ஒரு இருதரப்பு டி20 தொடரில் கேப்டனாக 3 முறை 50 ரன்களுக்கு மேல் விளாசிய வீரர்களின் பட்டியலில் விராட் கோலி, சூர்யகுமார் யாதவ் மற்றும் பாகிஸ்தானின் சாஹிப்ஸாதா ஃபர்ஹான் ஆகியோருடன் ஷாய் ஹோப் 4-வது கேப்டனாக இணைந்தார். இதில் மற்ற மூவரும் தங்களது சொந்த மண்ணில் இந்த சாதனையைப் படைத்த நிலையில், எதிரணியின் சொந்த மண்ணில் இச்சாதனையை நிகழ்த்திய ஒரே உலக கேப்டன் என்ற மாபெரும் சாதனையை ஷாய் ஹோப் படைத்துள்ளார்.

இவரது அதிரடியால் வெஸ்ட் இண்டீஸ் அணி பவர்பிளேயில் 79 ரன்கள் குவித்தது. சர்வதேச டி20 போட்டிகளில் இந்திய அணிக்கு எதிராக அடிக்கப்பட்ட அதிகபட்ச பவர்பிளே ஸ்கோராகவும் இது சமன் செய்யப்பட்டுள்ளது. இந்தப் போட்டியில் ஷாய் ஹோப் 50 பந்துகளில் 102 ரன்கள் குவித்து கடைசி வரை ஆட்டமிழக்காமல் இருந்தார். வெஸ்ட் இண்டீஸ் அணி 20 ஓவர்களில் 3 விக்கெட் இழப்பிற்கு 247 ரன்கள் குவித்தது.