"ரோஹித்தை மீண்டும் கேப்டன் ஆக்கினால்.. ".. மும்பை இந்தியன்ஸ் அணிக்கு அஸ்வின் சொன்ன ஐடியா

தொடர் காயங்களால் அவதிப்பட்டு வரும் ஹர்திக் பாண்டியா, 2026 ஐபிஎல் தொடருக்குப் பிறகு எந்தப் போட்டியிலும் விளையாடவில்லை. இதுபற்றிப் பேசிய அஸ்வின், "ஹர்திக் பல காயங்களைச் சந்தித்துவிட்டார். அவரைப் பற்றி பல்வேறு விமர்சனங்கள் உலவுகின்றன. ஒரு வீரர் மன அமைதியோடும் மகிழ்ச்சியாகவும் கிரிக்கெட் ஆட விரும்புகிறார். தான் முழு முயற்சி செய்தும் மும்பை அணியில் நிலைமை சரியாக அமையவில்லை என்று ஹர்திக் உணர்ந்தால், அவர் வேறு அணிக்கு மாறவே அதிக வாய்ப்புள்ளது" என்று குறிப்பிட்டார்.

மேலும், ரோஹித் சர்மா கேப்டனாகத் திரும்பினால் அணி வீரர்களின் முழு ஆதரவு அவருக்குக் கிடைக்கும் என்று அஸ்வின் தெரிவித்தார். சூர்யகுமார் யாதவ், ஜஸ்பிரித் பும்ரா ஆகியோர் ஏற்கெனவே ரோஹித்தின் தலைமையில் பல ஆண்டுகள் ஆடியவர்கள். ரோஹித் மீது ஒட்டுமொத்த அணிக்கும் மிகுந்த மரியாதை உண்டு. பும்ராவுக்கு கேப்டன் பதவி மீது தீவிர ஆசை இருப்பதாகத் தனக்குத் தோன்றவில்லை என்றும், 5 முறை கோப்பை வென்ற மும்பை இந்தியன்ஸ் அணியில் ரோஹித் நேர்மறையான சூழலை உருவாக்கினால் ஹர்திக் அழுத்தமின்றி சிறப்பாக விளையாட முடியும் என்றும் அஸ்வின் சுட்டிக்காட்டினார்.