இப்படி ஒரு மேட்ச்சிலா அறிமுகம் ஆகணும்.. ஆகிப் நபி செய்த சொதப்பல்.. தேர்வுக்குழு மீது பாய்ந்த ஆரோன்

இப்படி ஒரு மேட்ச்சிலா அறிமுகம் ஆகணும்.. ஆகிப் நபி செய்த சொதப்பல்.. தேர்வுக்குழு மீது பாய்ந்த ஆரோன்

குவஹாத்தி: வெஸ்ட் இண்டீஸ் அணிக்கு எதிரான 2வது ஒருநாள் போட்டியில் பெரும் எதிர்பார்ப்புகளுக்கு மத்தியில் அறிமுகமான இந்திய வேகப் பந்துவீச்சாளர் ஆகிப் நபி படுமோசமான பந்துவீச்சை பதிவு செய்தார். இந்தப் போட்டியில் வெஸ்ட் இண்டீஸ் அணி 50 ஓவர்களில் 405 ரன்கள் குவித்தது. பின்னர் ஆடிய இந்தியா 43.3 ஓவர்களில் 406 ரன்கள் எடுத்து 8 விக்கெட் வித்தியாசத்தில் வரலாற்று வெற்றி பெற்றது. கேப்டன் சுப்மன் கில் 223* ரன்களும், ரோஹித் சர்மா 101 ரன்களும் விளாசினர்.

இந்த போட்டியில் இந்திய அணியின் வேகப்பந்து வீச்சாளராக அறிமுகமான ஜம்மு காஷ்மீரைச் சேர்ந்த ஆகிப் நபி, அறிமுக போட்டியிலேயே அதிக ரன்களை வாரி வழங்கிய இந்திய பந்துவீச்சாளர் என்ற சோகமான சாதனையை படைத்தார்.

ரஞ்சி கோப்பையில் தொடர்ச்சியாக அபாரமாக செயல்பட்டு வந்த ஆகிப் நபிக்கு, நிதீஷ் குமார் ரெட்டிக்கு பதிலாக வாய்ப்பு அளிக்கப்பட்டது. ஆனால் பேட்டிங்கிற்கு சாதகமான குவஹாத்தி ஆடுகளத்தில் வெஸ்ட் இண்டீஸ் பேட்டர்களின் தாக்குதல் ஆட்டத்தில் சிக்கிய நபி, 8.5 ஓவர்களில் விக்கெட் எதுவும் வீழ்த்தாமல் 84 ரன்களை வாரி வழங்கினார். அவரது எகானமி 9.51 ஆக இருந்தது.

இதன் மூலம் 1975 உலகக்கோப்பையில் இங்கிலாந்துக்கு எதிராக கர்சன் காவ்ரி 83 ரன்கள் கொடுத்த சாதனையை முறியடித்து, அறிமுக போட்டியில் அதிக ரன் கொடுத்த இந்திய பந்துவீச்சாளர் என்ற மோசமான சாதனையை செய்தார்.

இதுகுறித்து முன்னாள் இந்திய வேகப்பந்து வீச்சாளர் வருண் ஆரோன் பேசுகையில், "ஆகிப் நபி ஒரு மிகச்சிறந்த டெஸ்ட் பந்துவீச்சாளர். அவரை சமீபத்திய இலங்கை டெஸ்ட் தொடரில் களமிறக்கியிருக்க வேண்டும். அதை செய்யாமல், ரன் குவியும் ஒருநாள் ஆடுகளத்தில் அறிமுகம் செய்து அவரது நம்பிக்கையை உடைத்துவிட்டனர். இங்கு முகமது சிராஜை ஆட வைத்திருக்க வேண்டும். ஒரு போட்டியை வைத்து நபியின் திறமையை எடைபோடாமல் அவருக்கு தொடர்ந்து வாய்ப்பளிக்க வேண்டும்" என்று காட்டமாக விமர்சித்தார்.