IND vs AFG: இசான் கிஷனுக்கு காயம்.. பேட்டிங் பயிற்சியில் பந்து தாக்கியது.. முதல் டி20
IND vs AFG: இசான் கிஷனுக்கு காயம்.. பேட்டிங் பயிற்சியில் பந்து தாக்கியது.. முதல் டி20-யில் சந்தேகம்
டெல்லி: ஆப்கானிஸ்தானுக்கு எதிரான முதல் டி20 போட்டிக்கு இரண்டு நாட்களுக்கு முன்பாக, டெல்லியில் நடைபெற்ற வலைப்பயிற்சியின் போது இந்திய அணியின் நட்சத்திர பேட்டர் இஷான் கிஷானுக்கு முதுகில் காயம் ஏற்பட்டுள்ளது. இது இந்திய அணிக்கு பெரும் கவலையை உருவாக்கியுள்ளது.
அருண் ஜெட்லி மைதானத்தில் நடைபெற்ற வலைப்பயிற்சியின் போது, வேகப்பந்து வீச்சாளர்களுக்கு எதிராக இஷான் கிஷன் பேட்டிங் செய்து கொண்டிருந்தார். அப்போது வலைப்பயிற்சி பந்துவீச்சாளராக இந்திய அணிக்கு உதவிக் கொண்டிருந்த நவ்தீப் சைனி வீசிய ஷார்ட் பிட்ச் பந்தை இடது கை பேட்டரான கிஷன் எதிர்கொள்ள முயன்றபோது காயம் ஏற்பட்டது.
இதனால் மைதானத்திலேயே அமர்ந்திருந்த அவருக்கு உடனடியாக பிசியோதெரபிஸ்ட் கமலேஷ் ஜெயின் சிகிச்சை அளித்தார். அதன் பிறகு அவர் மீண்டும் பேட்டிங் செய்ய வரவில்லை.அணியின் செய்தி ஊடக சந்திப்புகள் எதுவும் நேற்று நடைபெறாததால், கிஷானின் காயம் எவ்வளவு தீவிரமானது என்பது குறித்து இன்னும் அதிகாரப்பூர்வ தகவல்கள் வெளியாகவில்லை.
கடந்த சில மாதங்களாகவே இஷான் கிஷன் இடைவிடாமல் கிரிக்கெட் விளையாடி வருகிறார். அயர்லாந்து, இங்கிலாந்து மற்றும் ஜிம்பாப்வே சுற்றுப்பயணங்களில் அனைத்து போட்டிகளிலும் விளையாடிய அவர், அதன்பின் நேரடியாக துலீப் டிராபி இறுதிப்போட்டியில் ஈஸ்ட் ஜோன் அணியை வழிநடத்தினார். இந்த இறுதிப்போட்டியின் இரண்டு இன்னிங்ஸிலும் அவர் முறையே 270 மற்றும் 80 ரன்கள் குவித்து, சேப்பாக்கத்தின் கடுமையான வெயிலில் பல மணி நேரம் பேட்டிங் செய்தார்.
இந்த ஆட்டம் முடிந்த சில மணி நேரங்களிலேயே அவர் இந்த வலைப்பயிற்சியில் பங்கேற்றார் என்பது குறிப்பிடத்தக்கது. ஒருவேளை ஞாயிற்றுக்கிழமை நடைபெறும் முதல் டி20 போட்டியில் இஷான் கிஷன் விளையாட முடியாத நிலை ஏற்பட்டால், இந்திய அணியின் டாப்-ஆர்டரில் மாற்றம் செய்ய வேண்டியிருக்கும். இந்திய அணியில் தற்போது மற்றொரு விக்கெட் கீப்பராக சஞ்சு சாம்சன் மட்டுமே உள்ளார். எனவே, கிஷன் விலகினால் சாம்சனுக்கு அணியில் இடம் கிடைப்பது உறுதியாகும்.
அபிஷேக் சர்மா மற்றும் வைபவ் சூர்யவன்ஷி ஆகியோரை தொடக்க வீரர்களாக களம் இறக்கி, சஞ்சு சாம்சனை மூன்றாவது வரிசையில் விளையாட வைக்க அணி நிர்வாகம் பரிசீலிக்கலாம். தேவைப்பட்டால் வாஷிங்டன் சுந்தர் மற்றும் ஸ்ரேயாஸ் ஐயர் ஆகியோரும் மூன்றாவது வரிசை பேட்டிங்கிற்கு தயாராக உள்ளனர்.