ஆசிய போட்டி வரலாற்றில் குண்டு எறிதல் பிரிவில் ஹாட்ரிக் பதக்கம்..தஜிந்தர்பால் சிங் அபாரம்

ஆசிய போட்டி வரலாற்றில் குண்டு எறிதல் பிரிவில் ஹாட்ரிக் பதக்கம்..தஜிந்தர்பால் சிங் அபாரம்

ஐச்சி: ஆசிய விளையாட்டுப் போட்டிகளின் ஆண்கள் குண்டு எறிதல் பிரிவில் இந்தியாவின் முன்னணி தடகள வீரர் தஜிந்தர்பால் சிங் தூர் வெள்ளிப் பதக்கம் வென்று அசத்தியுள்ளார். இதன் மூலம் ஆசிய விளையாட்டுப் போட்டிகளில் தொடர்ச்சியாக தனது மூன்றாவது பதக்கத்தை வென்று அவர் வரலாற்றுப் புத்தகத்தில் இடம்பிடித்துள்ளார்.

பஞ்சாப்பைச் சேர்ந்த 31 வயதான இந்த நட்சத்திர வீரர், இதற்கு முன் 2018 மற்றும் 2022 ஆசிய விளையாட்டுப் போட்டிகளில் இந்தியாவுக்காக தங்கப் பதக்கங்களை வென்றிருந்தார். தற்போது 2026 ஆசிய விளையாட்டுப் போட்டியில் வெள்ளிப் பதக்கம் வென்று தனது பதக்கப் பட்டியலை நீட்டித்துள்ளார்.

இறுதிப் போட்டியில் தூர் தனது ஐந்தாவது முயற்சியில் அதிகபட்சமாக 20.64 மீட்டர் தூரம் குண்டு எறிந்து இரண்டாம் இடத்தைப் பிடித்தார். ஈரானின் முகமதுரெசா தயேபிசே தனது இரண்டாவது முயற்சியில் ஆசிய விளையாட்டு சாதனையான 20.81 மீட்டர் தூரம் எறிந்து தங்கப் பதக்கத்தை வென்றார்.

இதற்கு முன் ஆசிய விளையாட்டுப் போட்டிகளில் அதிக தூரம் குண்டு எறிந்த சாதனை தூர் வசமே இருந்தது. அவர் கடந்த 2018 ஆசிய விளையாட்டுப் போட்டியில் 20.75 மீட்டர் தூரம் எறிந்து சாதனை படைத்திருந்தார். தற்போது அந்தச் சாதனையை ஈரானின் தயேபிசே முறியடித்துள்ளார்.

இறுதிப் போட்டியில் தூர் தனது முதல் முயற்சியில் 20.06 மீட்டர் தூரத்தை எட்டினார். அதனைத் தொடர்ந்து அடுத்தடுத்த முயற்சிகளில் முறையே 20.26 மீட்டர், 19.77 மீட்டர், 19.71 மீட்டர் மற்றும் 20.64 மீட்டர் தூரத்திற்கு குண்டுகளை எறிந்து அசத்தினார். அவரது ஆறாவது மற்றும் இறுதி முயற்சி 'ஃபவுல்' என அறிவிக்கப்பட்டது. சவூதி அரேபியாவின் முகமது டோலு தனது மூன்றாவது முயற்சியில் 20.48 மீட்டர் தூரம் எறிந்து வெண்கலப் பதக்கத்தைக் கைப்பற்றினார்.

தொடர்ச்சியாக இரண்டு முறை சாம்பியனான தூர், இம்முறை தங்கப் பதக்கத்தை வெல்லும் முனைப்புடன் களம் இறங்கினார். ஒருவேளை அவர் தங்கப் பதக்கம் வென்றிருந்தால், தடகளப் பிரிவில் ஆசிய விளையாட்டில் தொடர்ச்சியாக மூன்று தங்கப் பதக்கங்களை வென்ற முதல் இந்திய வீரர் என்ற வரலாற்றுச் சாதனையைப் படைத்திருப்பார் என்பது குறிப்பிடத்தக்கது.