விஜயின் லண்டன் மிஷன்! யாருடன் ஒப்பந்தம்? எவ்வளவு முதலீடு?
விஜயின் லண்டன் மிஷன்! யாருடன் ஒப்பந்தம்? எவ்வளவு முதலீடு?
தமிழ்நாடு முதலமைச்சர் விஜய் தொழில் முதலீடுகளை ஈர்ப்பதற்காக லண்டன் செல்லும் நிலையில், எந்தெந்த நிறுவனங்களுடன் ஒப்பந்தங்கள் மேற்கொள்ளவுள்ளார் என்ற அதிகாரபூர்வ அறிக்கையை தமிழ்நாடு அரசு வெளியிட்டுள்ளது.
தமிழ்நாட்டிற்கு அதிகளவிலான தொழில் முதலீடுகளை ஈர்க்கும் நோக்கில், தமிழ்நாடு முதலமைச்சர் விஜய் இங்கிலாந்து தலைநகர் லண்டன் புறப்பட்டுச் சென்றுள்ளார். உலகளாவிய முதலீட்டாளர்களை சந்தித்து, தமிழ்நாட்டின் தொழில் வளர்ச்சிக்கான புதிய வாய்ப்புகளை உருவாக்குவது இந்தப் பயணத்தின் முக்கிய நோக்கமாகும்.
தமிழ்நாட்டை ஆசியாவிலேயே முதலீட்டுக்கு ஏற்ற முன்னணி மாநிலமாக உருவாக்க வேண்டும் என்ற இலக்குடன் அரசு பல்வேறு நடவடிக்கைகளை மேற்கொண்டு வருகிறது. முதலமைச்சர் தலைமையிலான அரசு பொறுப்பேற்ற குறுகிய காலத்திலேயே முதலீட்டாளர்கள் மாநாடு மூலம் ரூ.1 லட்சம் கோடிக்கும் அதிகமான முதலீடுகளுக்கான புரிந்துணர்வு ஒப்பந்தங்கள் மேற்கொள்ளப்பட்டுள்ளதாக அரசு தெரிவித்துள்ளது.
ஐரோப்பிய நிறுவனங்கள் மூலம் ரூ.8,491 கோடி முதலீடு :
தமிழ்நாட்டின் தொழில் வளர்ச்சியில் சர்வதேச நிறுவனங்களின் பங்களிப்பை அதிகரிக்கும் வகையில் பல்வேறு முயற்சிகள் மேற்கொள்ளப்பட்டு வருகின்றன.
ஐரோப்பிய நாடுகளைச் சேர்ந்த முன்னணி நிறுவனங்கள் தமிழ்நாட்டில் சுமார் ரூ.8,491 கோடி மதிப்பிலான முதலீட்டுத் திட்டங்களை முன்வைத்துள்ளதாகவும், இதன் மூலம் சுமார் 5,690 பேருக்கு வேலைவாய்ப்புகள் உருவாகும் வாய்ப்பு உள்ளதாகவும் தெரிவிக்கப்பட்டுள்ளது.
இந்த நடவடிக்கைகள் மூலம் தமிழ்நாட்டின் மீது சர்வதேச முதலீட்டாளர்களின் நம்பிக்கை அதிகரித்து வருவதாக அரசு குறிப்பிட்டுள்ளது.
பிரிட்டன் நிறுவனங்களுடன் புதிய முதலீட்டு வாய்ப்புகள் :
முதலமைச்சர் விஜய்யின் லண்டன் பயணம், இந்தியா-பிரிட்டன் இடையேயான வர்த்தக உறவுகளை மேலும் வலுப்படுத்தும் வகையில் அமைந்துள்ளது.
இந்தப் பயணத்தின் போது பிரிட்டனைச் சேர்ந்த பல்வேறு முன்னணி நிறுவனங்களுடன் ஆலோசனைகள் நடத்தப்பட உள்ளன. குறிப்பாக,
* மேம்பட்ட உற்பத்தித் துறை* வாகன உற்பத்தி மற்றும் மின்சார வாகனங்கள்* மின்னணுவியல் துறை* உலகளாவிய திறன் மையங்கள் (GCC)* தொழில்நுட்ப சேவைகள்
ஆகிய துறைகளில் புதிய முதலீடுகளை ஈர்ப்பதற்கு முக்கியத்துவம் அளிக்கப்பட உள்ளது.
CETA ஒப்பந்தம் மூலம் தமிழ்நாட்டுக்கு புதிய வாய்ப்புகள் :
இந்தியா-பிரிட்டன் விரிவான பொருளாதார மற்றும் வர்த்தக ஒப்பந்தம் (CETA) நடைமுறைக்கு வந்துள்ள நிலையில், தமிழ்நாடு இதன் மூலம் கிடைக்கும் புதிய வர்த்தக வாய்ப்புகளை பயன்படுத்திக் கொள்ளும் வகையில் செயல்பட்டு வருகிறது.
ஜவுளி, ஆடை உற்பத்தி, தோல் பொருட்கள், காலணிகள், வாகன உதிரிபாகங்கள், பொறியியல் பொருட்கள் மற்றும் மின்னணுவியல் போன்ற துறைகளில் பிரிட்டன் சந்தையில் தமிழ்நாட்டு நிறுவனங்களுக்கு அதிக வாய்ப்புகள் உருவாகும் என எதிர்பார்க்கப்படுகிறது.
மோட்டார் ஸ்போர்ட்ஸ் நகரம் திட்டம்: சில்வர்ஸ்டோன் சர்க்யூட்டில் ஆய்வு :
தமிழ்நாட்டில் உலகத்தரம் வாய்ந்த மோட்டார் ஸ்போர்ட்ஸ் நகரம் அமைக்கப்படும் என்று முதலமைச்சர் விஜய் சட்டப்பேரவை விதி எண்.110-ன் கீழ் அறிவித்திருந்தார்.
இந்தத் திட்டத்தை முன்னெடுக்கும் வகையில், உலகப் புகழ்பெற்ற சில்வர்ஸ்டோன் மோட்டார் ரேசிங் சர்க்யூட்டை முதலமைச்சர் பார்வையிட உள்ளார்.
* மோட்டார் ரேசிங் உள்கட்டமைப்பு* பாதுகாப்பு ஏற்பாடுகள்* சுற்றுப்பாதை வடிவமைப்பு* விளையாட்டு சுற்றுலா வாய்ப்புகள்* வணிக ரீதியான செயல்பாடுகள்
குறித்து ஆய்வு மேற்கொள்ளப்பட உள்ளது.
இதன் மூலம் தமிழ்நாட்டில் மோட்டார் ஸ்போர்ட்ஸ் துறையை வளர்ப்பதற்கான புதிய திட்டங்களுக்கு வழிவகுக்கும் என எதிர்பார்க்கப்படுகிறது.
செப்டம்பர் 17-ம் தேதி சென்னை திரும்புகிறார் :
முதலமைச்சர் விஜய் தலைமையிலான குழு இன்று (செப்டம்பர் 10) சென்னையில் இருந்து லண்டன் புறப்பட்டுள்ளது. இந்தப் பயணம் செப்டம்பர் 17-ம் தேதி நிறைவடைந்து குழு மீண்டும் சென்னை திரும்புகிறது.
இந்தக் குழுவில் பொதுப்பணிகள் மற்றும் விளையாட்டு மேம்பாட்டுத் துறை அமைச்சர் ஆதவ் அர்ஜுனா, தமிழ்நாடு விளையாட்டு மேம்பாட்டு ஆணையத்தின் உறுப்பினர் செயலர் மேகநாத ரெட்டி, தொழில் துறை வழிகாட்டி நிறுவனத்தின் (Guidance) மேலாண்மை இயக்குநர் மற்றும் தலைமைச் செயல் அதிகாரி தீபக் ஜேக்கப் உள்ளிட்ட அரசு அதிகாரிகள் இடம்பெற்றுள்ளனர்.
அரசியல் முக்கியத்துவம் பெறும் லண்டன் பயணம் :
முதலமைச்சரின் விஜயின் இந்த இங்கிலாந்து பயணம், தொழில் முதலீடுகளை ஈர்ப்பதுடன், தமிழ்நாட்டின் சர்வதேச பொருளாதார நிலையை மேலும் வலுப்படுத்தும் முயற்சியாக பார்க்கப்படுகிறது.
புதிய முதலீடுகள், வேலைவாய்ப்புகள் மற்றும் தொழில்நுட்ப வளர்ச்சியை மையமாகக் கொண்ட இந்தப் பயணம், தமிழ்நாடு அரசின் தொழில் வளர்ச்சி நடவடிக்கைகளில் முக்கிய கட்டமாக அமையும் என எதிர்பார்க்கப்படுகிறது.