ஆசிய போட்டி 2026: இந்திய ஆடவர் ஹாக்கி அணி அபாரம்.. இந்தோனேஷியாவுக்கு எதிராக கோல் மழை

ஆசிய போட்டி 2026: இந்திய ஆடவர் ஹாக்கி அணி அபாரம்.. இந்தோனேஷியாவுக்கு எதிராக கோல் மழை

ஐச்சி: ஆசிய விளையாட்டு போட்டிகளில் இந்திய ஆடவர் ஹாக்கி அணி தனது முதல் ஆட்டத்தில் இந்தோனேசியாவை வீழ்த்தி மாபெரும் வெற்றியுடன் தனது பயணத்தை தொடங்கியுள்ளது. இப்போட்டியில் இந்திய வீரர் தில்ப்ரீத் சிங் நான்கு அசத்தலான கோல்களை அடித்து அணியின் வெற்றிக்கு முக்கிய காரணமாக அமைந்தார்.

ஜப்பானின் ஐச்சி மாகாணத்தில் நடைபெற்ற இந்த ஆட்டத்தின் ஐந்தாவது நிமிடத்திலேயே ஷிலானந்த் லக்ரா அடித்த கோல் மூலம் இந்திய அணி முன்னிலை பெற்றது. அதனைத் தொடர்ந்து, 12வது நிமிடத்தில் தில்ப்ரீத் சிங்கின் நேர்த்தியான பாஸைப் பெற்று அபிஷேக் கோலாக மாற்ற, முதல் பகுதி முடிவில் இந்தியா 2-0 என்ற கணக்கில் முன்னிலை வகித்தது.

இரண்டாவது பகுதியில் இந்திய அணியின் கோல் மழை தொடர்ந்தது. ஆட்டத்தின் 18வது நிமிடத்தில் சுமித் மற்றும் அபிஷேக் கொடுத்த பந்தை தில்ப்ரீத் சிங் கோலாக்கினார். அடுத்த நிமிடமே தில்ப்ரீத் மீண்டும் ஒரு கோல் அடித்து அசத்தினார். அதன் பின்னர், அதே 19வது நிமிடத்தில் ராஜீந்தர் சிங் ஒரு கோல் அடிக்க, 21வது நிமிடத்தில் ஹர்திக் மற்றும் சுக்ஜீத்தின் கூட்டு முயற்சியில் மந்தீப் சிங் ஐந்தாவது கோலை அடித்தார்.

28வது நிமிடத்தில் கேப்டன் ஹர்மன்பிரீத் சிங் பெனால்டி கார்னர் வாய்ப்பை கோலாக மாற்றினார். இதன் மூலம் ஆட்டத்தின் முதல் பாதியிலேயே இந்திய அணி 7-0 என்ற கணக்கில் வலுவான முன்னிலைப் பெற்றது.

இரண்டாவது பாதியில், இந்தோனேசிய அணியின் அல் அர்த் அவ்லியா 33வது நிமிடத்தில் ஒரு கோல் அடித்தார். இருப்பினும், அதற்குப் பதிலடி கொடுக்கும் வகையில் இந்திய அணி அடுத்த ஐந்து நிமிடங்களுக்குள் மூன்று கோல்களை விளாசியது. 35வது நிமிடத்தில் ஷிலானந்தும், 37வது நிமிடத்தில் ஜர்மன்பிரீத் சிங்கின் அசிஸ்ட்டில் தில்ப்ரீத் சிங் தனது ஹேட்ரிக் கோலையும் அடித்தனர்.

தொடர்ந்து 38வது நிமிடத்தில் சுக்ஜீத் சிங் மீண்டெழுந்து ஒரு கோல் அடிக்க, இந்தியாவின் கோல் வேட்டை தொடர்ந்தது. பின்னர் 46, 48 ஆகிய நிமிடங்களில் சுக்ஜீத் சிங்கும், 49வது நிமிடத்தில் தில்ப்ரீத் சிங் தனது நான்காவது கோலையும் அடித்து இந்தோனேசியாவை முழுமையாக முடக்கினர். இந்திய அணி தனது அடுத்த போட்டியில் செவ்வாய்க்கிழமை அன்று இலங்கை அணியை எதிர்கொள்கிறது.

இந்தியா இந்த ஆசிய போட்டிகளில் தங்கம் வெல்லும் பட்சத்தில், 2028 ஆம் ஆண்டு லாஸ் ஏஞ்சல்ஸ் நகரில் நடைபெறவுள்ள ஒலிம்பிக் போட்டிக்கு நேரடியாகத் தகுதி பெறும் வாய்ப்பைப் பெறும். ஆசிய விளையாட்டுப் போட்டிகளில் வரலாற்று ரீதியாக ஆதிக்கம் செலுத்தி வரும் இந்திய ஆடவர் ஹாக்கி அணி இதுவரை நான்கு முறை தங்கப் பதக்கம் வென்றுள்ளது.

இறுதியாக நடைபெற்ற ஹங்சோ ஆசிய விளையாட்டுப் போட்டியில் ஹர்மன்பிரீத் சிங் தலைமையில் ஜப்பானை 5-1 என்ற கணக்கில் வீழ்த்தி தங்கம் வென்றிருந்தது குறிப்பிடத்தக்கது. சமீபத்தில் நடைபெற்ற உலகக் கோப்பையில் 8வது இடத்தைப் பிடித்த இந்திய அணிக்கு, ஜப்பானில் தங்கம் வெல்வது ஹர்மன்பிரீத் சிங் மற்றும் பயிற்சியாளர் கிரேக் ஃபுல்டன் தலைமையிலான அணிக்கு பெரும் தன்னம்பிக்கையை அளிக்கும்.

ஆசிய விளையாட்டுப் போட்டிகளில் இந்திய அணி மிகச்சிறந்த வரலாற்றைக் கொண்டுள்ளது. 2006 தோஹாவில் 5வது இடத்தை பிடித்ததை தவிர மற்ற அனைத்து போட்டிகளிலும் இந்திய அணி தங்களது பதக்கத்தை உறுதி செய்துள்ளது. இதில் தங்கம் தவிர ஒன்பது வெள்ளி மற்றும் மூன்று வெண்கலப் பதக்கங்கள் அடங்கும்.