மகளிர் கிரிக்கெட் வரலாற்றிலேயே யாரும் தொடாத புதிய உச்சம்.. மெகா சாதனை செய்த ஸ்மிருதி மந்தனா

மகளிர் கிரிக்கெட் வரலாற்றிலேயே யாரும் தொடாத புதிய உச்சம்.. மெகா சாதனை செய்த ஸ்மிருதி மந்தனா

நிஷின்: ஜப்பானில் நடைபெற்று வரும் 2026 ஆசிய விளையாட்டு மகளிர் கிரிக்கெட் இறுதிப்போட்டியில், இந்திய அணியின் நட்சத்திர வீராங்கனை ஸ்மிருதி மந்தனா புதிய உலக சாதனை படைத்துள்ளார். சர்வதேச மகளிர் கிரிக்கெட் வரலாற்றில் 11,000 ரன்களைக் கடந்த உலகின் முதல் வீராங்கனை என்ற வரலாற்றுச் சாதனையை அவர் தன்வசப்படுத்தினார்.

இலங்கைக்கு எதிரான தங்கப் பதக்கத்துக்கான இறுதி ஆட்டத்தில், 11,000 ரன்கள் என்ற இமாலய மைல்கல்லை எட்ட ஸ்மிருதி மந்தனாவுக்கு 13 ரன்கள் மட்டுமே தேவைப்பட்டது. இந்த நிலையில், இலங்கைக்கு எதிரான இறுதிப் போட்டியில் களமிறங்கிய அவர், வெறும் 10 பந்துகளில் 13 ரன்களைக் கடந்து இந்த வரலாற்றுச் சாதனையை நிகழ்த்தினார். அதன் பிறகும் அதிரடியை தொடர்ந்த அவர் 45 பந்துகளில் 79 ரன்கள் குவித்தார்.

மகாராஷ்டிராவைச் சேர்ந்த 30 வயதான ஸ்மிருதி மந்தனா, கடந்த 2013-ம் ஆண்டு சர்வதேச கிரிக்கெட்டில் அறிமுகமானார். இதுவரை 9 டெஸ்ட், 120 ஒருநாள் மற்றும் 179 டி20 போட்டிகளில் விளையாடியுள்ள அவர், ஒட்டுமொத்தமாக 18 சதங்கள் மற்றும் 76 அரைசதங்களுடன் 11,001 ரன்களைக் குவித்துள்ளார். இதில் டெஸ்ட் போட்டிகளில் 788 ரன்களும், ஒருநாள் போட்டிகளில் 5,411 ரன்களும், டி20 போட்டிகளில் 4,792 ரன்களும் அடங்கும்.

சர்வதேச மகளிர் டி20 போட்டிகளில் அதிக ரன்கள் குவித்த வீராங்கனையாகவும் ஸ்மிருதி மந்தனா திகழ்கிறார். முன்னதாக, முன்னாள் இந்திய கேப்டன் மிதாலி ராஜ் 333 போட்டிகளில் 10,868 ரன்கள் எடுத்து உலக சாதனையில் முதலிடத்தில் இருந்தார். அண்மையில் நடந்த ஆசிய கோப்பையில் ஹாங்காங் அணிக்கு எதிராக 64 பந்துகளில் 124 ரன்கள் விளாசியதன் மூலம் மிதாலி ராஜின் உலக சாதனையை ஸ்மிருதி மந்தனா முறியடித்திருந்தார். தற்போது ஆசிய விளையாட்டு இறுதிப்போட்டியில் சர்வதேச மகளிர் கிரிக்கெட்டில் 11,000 ரன்களைக் கடந்த முதல் வீராங்கனை என்ற தனித்துவமான சாதனையை மந்தனா செய்துள்ளார்.

மற்றொரு தொடக்க வீராங்கனையான ஷபாலி வர்மா ஒரே ஆண்டில் அதிக சர்வதேச டி20 ரன்கள் குவித்த வீராங்கனை என்ற சாதனையை செய்தார். ஒரே போட்டியில் ஷபாலி வர்மா மற்றும் ஸ்மிருதி மந்தனா ஆகிய இரு இந்திய தொடக்க வீராங்கனைகளும் அடுத்தடுத்து உலக சாதனைகளைப் படைத்துள்ளது இந்திய கிரிக்கெட் ரசிகர்களை உற்சாகத்தில் ஆழ்த்தியுள்ளது.