10 போட்டிகள் விளையாடி, 2 நாட்கள் போராடி.. டெகத்லானில் வெண்கலம் வென்றார் இந்தியாவின் தேஜஸ்வின் சங்கர்

10 போட்டிகள் விளையாடி, 2 நாட்கள் போராடி.. டெகத்லானில் வெண்கலம் வென்றார் இந்தியாவின் தேஜஸ்வின் சங்கர்

நகோயா: ஜப்பானில் நடைபெற்று வரும் 2026 ஆசிய விளையாட்டுப் போட்டியின் தடகளப் பிரிவில், இந்திய வீரர் தேஜஸ்வின் சங்கர் வெண்கலப் பதக்கம் வென்று புதிய சாதனை படைத்துள்ளார். ஆண்களுக்கான மிகக் கடினமான டெகத்லான் பிரிவில் மொத்தம் 7,934 புள்ளிகள் குவித்து அவர் 3-வது இடத்தைப் பிடித்தார்.

ஆசிய விளையாட்டுப் போட்டிகளில் தேஜஸ்வின் சங்கர் தொடர்ந்து வெல்லும் 2-வது பதக்கம் இதுவாகும். கடந்த 2023 ஹாங்சோ ஆசிய விளையாட்டில் வெள்ளிப் பதக்கம் வென்றிருந்த இவர், தற்போது நகோயாவிலும் வெண்கலப் பதக்கம் வென்று தொடர்ந்து 2-வது முறையாகப் பதக்க மேடையை அலங்கரித்துள்ளார்.

2026 ஆசிய விளையாட்டில் 100 மீட்டர் ஓட்டம், 400 மீட்டர் ஓட்டம், 110 மீட்டர் தடை ஓட்டம், குண்டு எறிதல், உயரம் தாண்டுதல், நீளம் தாண்டுதல், ஈட்டி எறிதல், வட்டு எறிதல், போல் வால்ட், 1500 மீட்டர் ஓட்டம் என மொத்தம் 10 வகையான போட்டிகளை உள்ளடக்கிய டெகத்லான் பந்தயம் 2 நாட்களாக நடைபெற்றது. இதில் தொடக்கம் முதலே சீரான திறமையை வெளிப்படுத்திய தேஜஸ்வின் சங்கர், கடைசி போட்டியான 1500 மீட்டர் ஓட்டத்தை 4:33.09 நிமிடங்களில் கடந்து முதலிடம் பிடித்து வெண்கலப் பதக்கத்தை உறுதி செய்தார்.

இப்போட்டியில் ஜப்பான் வீரர் மருயாமா 8,123 புள்ளிகளுடன் தங்கப் பதக்கத்தையும், சீனாவின் சென் 8,012 புள்ளிகளுடன் வெள்ளிப் பதக்கத்தையும் கைப்பற்றினர். இந்தப் போட்டிகளில் தேஜஸ்வின் சங்கர் உயரம் தாண்டுதலில் 2.18 மீட்டர், நீளம் தாண்டுதலில் 7.53 மீட்டர், ஈட்டி எறிதலில் 53.37 மீட்டர் தூரம் எறிந்தார். மேலும் 100 மீட்டரை 10.98 வினாடிகளிலும், 400 மீட்டரை 48.59 வினாடிகளிலும் கடந்து அசத்தினார். 10 விதமான தடகள சவால்களையும் வெற்றிகரமாக எதிர்கொண்டு அவர் வென்றுள்ள இந்த வெண்கலப் பதக்கம் இந்திய தடகள அணிக்குப் பெருமை சேர்த்துள்ளது.