தவெக நட்சத்திர பேச்சாளர் பட்டியல் ஏன் நீக்கம்? வன்னியரசு சொன்ன பரபரப்பு காரணம்!

தவெக நட்சத்திர பேச்சாளர் பட்டியல் ஏன் நீக்கம்? வன்னியரசு சொன்ன பரபரப்பு காரணம்!

தவெக நட்சத்திர பேச்சாளர் பட்டியல் அல்ல... மதச்சார்பற்ற சமூகநீதி வெற்றி கூட்டணி என அறிவித்திருக்க வேண்டும் - அமைச்சர் வன்னியரசு

விழுப்புரம்: இடைத்தேர்தலில் தமிழக வெற்றிக் கழகம் சார்பில் வெளியிடப்பட்ட நட்சத்திரப் பேச்சாளர்கள் பட்டியலில், கூட்டணிக் கட்சித் தலைவர்களின் பெயர்களை இடம்பெறச் செய்ததற்கு பதிலாக “மதச்சார்பற்ற சமூகநீதி வெற்றி கூட்டணி” என்ற பெயரில் நட்சத்திரப் பேச்சாளர்கள் பட்டியல் வெளியிடப்பட்டிருக்க வேண்டும் என்று சமூகநீதித் துறை அமைச்சர் வன்னியரசு தெரிவித்துள்ளார்.

விழுப்புரம் மாவட்டம் திருவக்கரை அருகேயுள்ள கொடுக்கூரில் செயல்பட்டு வரும் ஆதிதிராவிடர் நலத்துறை நலப்பள்ளியில் சமூகநீதித் துறை அமைச்சர் வன்னியரசு ஆய்வு மேற்கொண்டார். அப்போது பள்ளி மாணவர்களுக்கு உணவு முறையாக வழங்கப்படுகிறதா, பள்ளியில் அடிப்படை வசதிகள் செய்யப்பட்டுள்ளதா என்பது குறித்து மாணவர்களிடம் அவர் கேட்டறிந்தார்.

தொடர்ந்து செய்தியாளர்களிடம் பேசிய அமைச்சர் வன்னியரசு, தமிழக அரசின் காமராஜர் காலை உணவுத் திட்டம் மாநிலம் முழுவதும் விரிவுபடுத்தப்பட்டு சிறப்பாக செயல்படுத்தப்பட்டு வருவதாக தெரிவித்தார். இந்தத் திட்டம் மாணவர்களிடையே நல்ல வரவேற்பைப் பெற்றுள்ளதாகவும் அவர் கூறினார்.

காலை உணவுத் திட்டம் தொடர்பாக தமிழக வெற்றிக் கழகத்தின் சார்பில் மேற்கொள்ளப்பட்ட நடவடிக்கைகளுக்கு விடுதலைச் சிறுத்தைகள் கட்சி சார்பில் முதலமைச்சர் விஜய்க்கு நன்றி தெரிவிப்பதாகவும் வன்னியரசு தெரிவித்தார்.

அரசு பள்ளிகளை தரம் உயர்த்த வேண்டும்

அரசுப் பள்ளிகளை தரம் உயர்த்துவது மிகவும் முக்கியமானது என்று கூறிய அமைச்சர், மாணவர்களின் இடைநிற்றலைத் தடுப்பதற்கான பல்வேறு நடவடிக்கைகள் மேற்கொள்ளப்பட்டு வருவதாகவும் தெரிவித்தார்.

மேலும், இடைத்தேர்தலை முன்னிட்டு தமிழக வெற்றிக் கழகம் சார்பில் வெளியிடப்பட்ட நட்சத்திரப் பேச்சாளர்கள் பட்டியல் தொடர்பாகவும் அவர் கருத்து தெரிவித்தார்.

“தமிழக வெற்றிக் கழகம் நட்சத்திரப் பேச்சாளர்கள் என தலைவர்களின் பெயர்களை வெளியிட்டதற்கு பதிலாக, மதச்சார்பற்ற சமூகநீதி வெற்றி கூட்டணி நட்சத்திரப் பேச்சாளர்கள் என வெளியிட்டிருக்க வேண்டும். அதனால் அந்தப் பட்டியல் நீக்கப்பட்டுள்ளது. மீண்டும் மதச்சார்பற்ற வெற்றி கூட்டணி என்ற பெயரில் பட்டியல் அறிவிக்கப்படும்” என்று வன்னியரசு கூறினார்.

இடைத்தேர்தல் பிரசாரத்துக்கான தவெக நட்சத்திரப் பேச்சாளர் பட்டியலில் கூட்டணிக் கட்சிகளைச் சேர்ந்த தலைவர்களின் பெயர்கள் இடம்பெற்றிருப்பது தொடர்பாக ஏற்கெனவே விவாதம் எழுந்துள்ளது.

சட்டப்பேரவையில் ஆக்கப்பூர்வமான கேள்விகளுக்கு பதிலளிக்க தயார்

சட்டப்பேரவையில் ஆக்கப்பூர்வமான கேள்விகள் எழுப்பப்பட வேண்டும் என்றும், எப்போது ஆக்கப்பூர்வமான கேள்விகள் சட்டப்பேரவையில் முன்வைக்கப்பட்டாலும் அதற்கு பதில் அளிக்க தயாராக இருப்பதாகவும் அமைச்சர் வன்னியரசு தெரிவித்தார்.

“திருமாவளவனை முதல்வராக்குவதுதான் எங்கள் கனவு”

விசிக தலைவர் திருமாவளவன் “சி.எம். 2031” என்ற பதிவெண் கொண்ட காரில் பயணம் செய்த விவகாரம் குறித்த கேள்விக்கு பதிலளித்த வன்னியரசு, அது ஒரு விளம்பரப் படத்திற்காக எடுக்கப்பட்டதாகவும், அதற்கான விளக்கம் ஏற்கெனவே அளிக்கப்பட்டுள்ளதாகவும் தெரிவித்தார். இந்த விவகாரத்தை சிலர் உள்நோக்கத்துடன் அரசியலாக்குவதாகவும் அவர் குற்றம்சாட்டினார்.

“ஒவ்வொரு அரசியல் கட்சியினருக்கும் தங்களது கட்சித் தலைவரை முதலமைச்சராக்க வேண்டும் என்ற எண்ணம் இருக்கும். அதேபோல், எங்களது கனவும் இலக்கும் திருமாவளவனை முதலமைச்சராக்குவதுதான்” என்று வன்னியரசு தெரிவித்தார். “சி.எம். 2031” பதிவெண் கொண்ட காரில் திருமாவளவன் சென்ற காட்சிகள் சமூக வலைதளங்களில் வெளியாகி அரசியல் விவாதத்தை ஏற்படுத்தியிருந்தன.

இடைத்தேர்தலில் கூட்டணி வெற்றி பெறும் என நம்பிக்கை

இடைத்தேர்தலில் மதச்சார்பற்ற சமூகநீதி கூட்டணி வெற்றி பெறும் என்ற நிலைப்பாட்டை விசிக தலைவர் திருமாவளவன் தெரிவித்துள்ளதாகவும், அதே நிலைப்பாடுதான் தன்னுடையதும் என்றும் வன்னியரசு கூறினார். மேலும், பாரதிதாசன் தொடர்பான விவகாரம் அரசியலாக்கப்பட்டுள்ளதாகக் கூறிய அவர், அவர் கல்வி பயில வேண்டும் என்பதற்காகவே நிதி அனுப்பப்பட்டதாக தெரிவித்தார். இவ்வாறு இடைத்தேர்தல், கூட்டணி மற்றும் அரசுப் பள்ளிகள் தொடர்பான பல்வேறு கேள்விகளுக்கு அமைச்சர் வன்னியரசு பதிலளித்தார்.

தலைப்பு செய்திகள்

ஃபோட்டோ கேலரி