IND vs WI: இந்த 2 வீரரை நீக்கிய கம்பீர் முடிவு சரியானது தான்.. புஜாரா பாராட்டு
IND vs WI: இந்த 2 வீரரை நீக்கிய கம்பீர் முடிவு சரியானது தான்.. புஜாரா பாராட்டு
மும்பை: மேற்கு இந்தியத் தீவுகளுக்கு எதிரான மூன்றாவது டி20 போட்டியில், ஆடுகளத் தன்மைக்கு ஏற்ப இந்திய அணித் தேர்வை மேற்கொண்ட நிர்வாகத்தின் முடிவை முன்னாள் இந்திய வீரர் சேதேஷ்வர் புஜாரா ஆதரித்துள்ளார். இந்தூரில் நடைபெற்ற இப்போட்டியில் குல்தீப் யாதவுக்குப் பதிலாக பிரின்ஸ் யாதவையும், சிவம் துபேவுக்குப் பதிலாக நிதிஷ் குமார் ரெட்டியையும் பிளேயிங் லெவனில் சேர்த்தது சரியான முடிவு என்று அவர் தெரிவித்துள்ளார்.
இந்தூர் ஹோல்கர் மைதானத்தில் நடைபெற்ற இப்போட்டியில், முதலில் பேட்டிங் செய்த இந்திய அணி 223 ரன்கள் குவித்தது. தொடர்ந்து களமிறங்கிய மேற்கு இந்தியத் தீவுகள் அணியை 209-7 ரன்களுக்குக் கட்டுப்படுத்தி, 14 ரன்கள் வித்தியாசத்தில் இந்தியா வெற்றி பெற்றது.
இது குறித்து பேசிய புஜாரா, "இந்திய அணியின் தேர்வு மிகவும் சிறப்பாக இருந்தது. டி20 போட்டிகளைப் பொறுத்தவரை, குறிப்பிட்ட நாளின் சூழல் மற்றும் மைதானத்தின் தன்மைக்கு ஏற்ப சிறந்த 11 வீரர்களைத் தேர்வு செய்வதே சரியானது. குல்தீப் சிறப்பாகப் பந்துவீசி வந்தபோதிலும், இந்த மைதானத்திற்கு பிரின்ஸ் யாதவ் போன்ற ஒரு வீரர் தேவைப்பட்டார்.
அதேபோல் சிவம் துபேவுக்குப் பதிலாக நிதிஷ் குமார் ரெட்டியைத் தேர்வு செய்ததும் நல்ல முடிவே. துபே சிறந்த டி20 வீரர் என்பதில் மாற்றுக் கருத்து இல்லை, ஆனால் ரெட்டி அவரை விடச் சிறந்த பந்துவீச்சாளர்" என்று கூறினார்.
இப்போட்டியில் பிரின்ஸ் யாதவ் பந்துவீச்சில் 4 ஓவர்களில் 37 ரன்கள் விட்டுக் கொடுத்தார். அதற்கு முன் பேட்டிங்கில் 6 பந்துகளில் ஆட்டமிழக்காமல் 13 ரன்கள் சேர்த்தார். நிதிஷ் குமார் ரெட்டி 14 பந்துகளில் 21 ரன்கள் எடுத்ததுடன், குவென்டின் சேம்ப்சனின் விக்கெட்டையும் வீழ்த்திப் பங்களித்தார்.
இப்போட்டியில் 4 ஓவர்களில் 44 ரன்கள் விட்டுக்கொடுத்து 3 விக்கெட்டுகளை வீழ்த்திய இடதுகை வேகப்பந்துவீச்சாளர் அர்ஷ்தீப் சிங் ஆட்டநாயகன் விருது பெற்றார். அர்ஷ்தீப் சிங்கின் பந்துவீச்சு குறித்துப் பேசிய புஜாரா, "மேற்கு இந்தியத் தீவுகள் பேட்டர்களுக்கு, குறிப்பாக ஷாய் ஹோப்பிற்கு அதிக இடைவெளி கொடுக்கக் கூடாது என்ற சரியான திட்டத்துடன் இந்தியப் பந்துவீச்சாளர்கள் செயல்பட்டனர்.
அர்ஷ்தீப் சிங் வழக்கமாக ஓவர் தி ஸ்டம்பில் பந்துவீசவே விரும்புவார். ஆனால் இப்போட்டியில் அரவுண்ட் தி ஸ்டம்பில் பந்துவீசித் தனக்குத்தானே சவால் விடுத்துக் கொண்டார். அந்த கோணத்தில் இருந்து ஸ்டம்பை நோக்கிப் பந்துவீசி அதற்குரிய பலனையும் பெற்றார்" என்று பாராட்டினார்.இந்தியா மற்றும் மேற்கு இந்தியத் தீவுகள் அணிகளுக்கு இடையிலான 5 போட்டிகள் கொண்ட இத்தொடரின் நான்காவது டி20 போட்டி, அக்டோபர் 14 அன்று ஹைதராபாத்தில் உள்ள ராஜீவ் காந்தி சர்வதேச மைதானத்தில் நடைபெறவுள்ளது.