சிஎஸ்கே

சிஎஸ்கே-வுக்கு தோனி போட்ட கட்டளை.. ஜாகீர் கான் பயிற்சியாளராக வந்த காரணமே இதுதான்.. என்ன நடந்தது?

சென்னை: ஐபிஎல் அரங்கில் ஐந்து முறை சாம்பியன் பட்டம் வென்ற சென்னை சூப்பர் கிங்ஸ் அணியின் புதிய தலைமை பயிற்சியாளராக, இந்திய அணியின் முன்னாள் நட்சத்திர வேகப்பந்து வீச்சாளர் ஜாகீர் கான் அதிகாரப்பூர்வமாக நியமிக்கப்பட்டுள்ளார். கடந்த 18 சீசன்களாக சிஎஸ்கே பயிற்சியாளராக இருந்த ஸ்டீபன் பிளெமிங், இங்கிலாந்து டெஸ்ட் அணியின் பயிற்சியாளராகச் சென்றதைத் தொடர்ந்து இந்த அதிரடி மாற்றம் நிகழ்ந்துள்ளது.

சிஎஸ்கே அணிக்கு நன்கு அறிமுகமான அனுபவம் வாய்ந்த ஒரு இந்தியரையே பயிற்சியாளராக நியமிக்க வேண்டும் என்பதில் தோனி தீவிர முனைப்பு காட்டினார். தோனி, கேப்டன் ருதுராஜ் கெய்க்வாட் மற்றும் நிர்வாகி ரூபா குருநாத் ஆகியோர் அடங்கிய ஆலோசனைக் குழு ஒருமனதாக ஜாகீர் கானைத் தேர்வு செய்தது.

தோனி சொன்னதை ஏற்று பயிற்சியாளரை தேர்வு செய்ய முடிவு செய்த சிஎஸ்கே நிர்வாகம் அதற்கு நீண்ட காலம் எடுத்துக் கொண்டது. டெல்லி கேப்பிடல்ஸ் அணியின் பயிற்சியாளர் ஹேமங் பதானியை சிஎஸ்கே-வுக்கு கொண்டு வரப் போவதாக பரவலாக பேசப்பட்டது. ஆனால், அதற்கு மாறாக இறுதியில் ஜாகீர் கான் தேர்வு செய்யப்பட்டுள்ளார்.

இந்தப் புதிய பொறுப்பை ஏற்றது குறித்துப் பேசிய ஜாகீர் கான், "ஐபிஎல் வரலாற்றின் மிகச் சிறந்த அணியில் இணைந்ததை பெருமையாகக் கருதுகிறேன். சேப்பாக்கம் மைதானத்தில் ரசிகர்கள் உருவாக்கும் ஆரவாரம் அலாதியானது. சிஎஸ்கே அணியுடன் இணைந்து புதிய வெற்றிகளைப் படைக்க ஆவலுடன் காத்திருக்கிறேன்" என்று தெரிவித்தார்.

தோனியின் நம்பிக்கைக்குரிய பந்துவீச்சாளராகத் திகழ்ந்த ஜாகீர் கான், 2011 உலகக் கோப்பையில் 21 விக்கெட்டுகளை அள்ளி அதிக விக்கெட் வீழ்த்திய வீரராக முத்திரை பதித்தார். இந்திய அணிக்காக 92 டெஸ்ட், 200 ஒருநாள், 17 டி20 மற்றும் ஐபிஎல் தொடரில் 100 போட்டிகளில் விளையாடியுள்ளார். ஐபிஎல் தொடரில் மும்பை இந்தியன்ஸ் மற்றும் லக்னோ சூப்பர் ஜெயன்ட்ஸ் அணிகளில் முக்கியப் பொறுப்புகளை வகித்து இளம் வீரர்களை வழிநடத்திய அனுபவம் இவருக்கு உண்டு.

இயன் மோர்கன், ஹேமங் பதானி போன்ற பெயர்கள் பரிசீலிக்கப்பட்டாலும், தோனியுடனான நீண்ட கால நட்பும், ஆட்டத்தை நுணுக்கமாகக் கணிக்கும் திறனுமே ஜாகீர் கானை சிஎஸ்கே-வின் தலைமைப் பயிற்சியாளராக அமர வைத்துள்ளது.