Asian Games 2026: உஸ்பெகிஸ்தானை 19

Asian Games 2026: உஸ்பெகிஸ்தானை 19-0 என நொறுக்கிய இந்திய மகளிர் ஹாக்கி அணி.. தீபிகா 8 கோல்கள்

நகோயா: ஜப்பானில் நடைபெற்று வரும் 2026 ஆசிய விளையாட்டுப் போட்டியில், இந்திய மகளிர் ஹாக்கி அணி தனது முதல் போட்டியிலேயே இமாலய வெற்றியைப் பதிவு செய்துள்ளது. காகாமிகஹாரா மைதானத்தில் நடைபெற்ற பூல்-பி பிரிவு லீக் ஆட்டத்தில் உஸ்பெகிஸ்தான் அணியை 19-0 என்ற இமாலய கோல் கணக்கில் இந்திய அணி துவம்சம் செய்தது.

ஆட்டம் தொடங்கிய 6-வது நிமிடத்திலேயே லால்ரெம்சியாமி முதல் கோலை அடித்து கணக்கைத் தொடங்கினார். அடுத்தடுத்து புயல் வேகத்தில் தாக்குதல் ஆட்டத்தை வெளிப்படுத்திய இந்திய வீராங்கனைகள், முதல் 18 நிமிடங்களிலேயே 5-0 என அசைக்க முடியாத முன்னிலை பெற்றனர்.

இந்திய அணியின் 22 வயது நட்சத்திர வீராங்கனை தீபிகா குமாரி களத்தில் ருத்ரதாண்டவம் ஆடினார். தனது அபாரமான டிராக்-பிளிக் திறமையால் பெனால்டி கார்னர்களை கோல்களாக மாற்றிய அவர், தனி நபராக மொத்தம் 8 கோல்களை விளாசி மலைக்க வைத்தார். இதில் 3-வது காலிறுதிப் பகுதியில் மட்டுமே அவர் அடுத்தடுத்து 4 கோல்களைப் பதிவு செய்தார்.

இஷிகா 3 கோல்களையும், நவ்நீத் கவுர் மற்றும் லால்தன்லுவாங்கி தலா 2 கோல்களையும் அடித்தனர். மேலும் பல்ஜீத் கவுர், நேஹா, சாக்ஷி ராணா ஆகியோர் தலா 1 கோல் அடித்து இந்திய அணியின் வெற்றியை பிரம்மாண்டமாக்கினர்.

உஸ்பெகிஸ்தான் அணியால் ஆட்டம் முழுவதும் ஒரே ஒரு முறை மட்டுமே இந்திய கோல் கம்பத்தை நோக்கி பந்தை அடிக்க முடிந்தது. அதையும் இந்திய கோல்கீப்பர் சவிதா புனியா மிக லாவகமாகத் தடுத்து நிறுத்தினார். சோர்ட் மரின் பயிற்சியின் கீழ் களமிறங்கியுள்ள இந்திய மகளிர் அணி, தனது அடுத்த லீக் போட்டியில் நாளை (செப்டம்பர் 21) இந்தோனேசியாவை எதிர்கொள்கிறது.